KRISTIAN CHHUNGKUA

Tirhkohte Thiltih : 16:31-34

Nichina kan Bible chang chhiar takah khan Paula te leh tan invengtu inbiakna kan hmu a. Paula te kha chhungkaw chhandamna an ngaipawimawh hle a ni tih kan hmu a, tin, khamite chhungkuaa kan thil hmuh ropui tak chu Pathian an rin avangin an chhungkua an hlim ta em em a ni tih kan hmu bawk a ni. He zorama chhungkaw hrang hrangte hi en ta i  la, chhungkua a chhandam ni hi engzat nge awm ang? Pathian rin avanga chhungkua a hlim em em hi engzat nge a awm ang? Kan rama sualna pun chak dan te, kan ram natna kan thlir chuan chhungkua a chhandam ni lo, Pathian rin avanga hlim zo lo chhungkua hi kan tam hlein a rinawm. Chuvang chuan Kristian Chhungkua hi Pulpit tlangah kan sawi tam a tulin ka hria a, harhna in kan ram a tuam mek lai hian chhungkaw damna lo thleng ve zel se tih hi ka duh em em a ni.

Kristian chhungkua chu eng a nih? Sawi tam ngai lovin kan hria a, Isua Krista Lalna chhungkua, engkim aia Isua dah pawimawh chhungkua, chhungkaw member tinte Pathian neitu an nihna chhungkua, Krista avanga eng dinhmunah pawh ding chunga hlim thinte hi Kristian chhungkua an ni ti mai ila a fel mai awm e.

A dawt lehah chuan Kristian chhungkua din chu tu mawhphurhna nge? Kristian chhungkua din tur hian mawhphurhna la lian bik an awm lo a, chhungkaw member tinte tanrual a ngai. A hmasa berah chuan Chhungkaw pa berin mawhphurhna a lak ngam a ngai. Nova chungchangah kan hmu a, Pathianin khawvel mihring sual avanga tui let hmanga a hrem dawn khan Nova chu lawng tuk turin a ti a, amah bakah a nupui fanau te sahimna turin. Nova dinhmun kha ngaihtuah ta ila, thuawih taka lawng han tuk mai kha a har viau ang. Tunlai angin weather forcast, khawchin hrilh lawkna a awm tha lo anga, a let hun tur pawh a hriat lo hang.  A lawngah khan an chhungkua bakah rannung chitin reng leng tura tih a nih avang khan a tuk chhung pawh a rei viau turah ngai ta ila. Amah leh a nupui fanaute damna tur khan hun rei tak chhung lawng a tuk ngeiin a rinawm a ni. Khaw tha thiang vel vawl tak hnuaiah lawng an tuk anga, an thenawm vel a mite phei chuan nuih te pawh an nuihzat deuh maithei, a fate pawh khan an thiante’n i pan enge a tih an han ti anga, “Lawng a tuk” an ti deuh reng mai dawn a ni. Mahse, Nova khan mite’n awmlo tiin nuihzat mahsela huaisen takin an chhungkaw dam nan lawng a tuk a, a hnuah chuan an chhungkua chauh chhandamin an awm ta a nih kha. Zorama chhungkaw pa te zingah hian chhandamna lawng tuk ngamlo engzat nge awm ang? Mi nih ang nih vet um, mi phak ang phak vek tuma kan intlansiak mek naah hian Nova anga chhungkua chhandamna lawng tuk nachang hria chhungkaw pa kan mamawh hle a ni.

A dawt leh ah chuan nu mawhphurhna pawh a sang hle mai. Timothea, naupang taka Pathian tana rinawm taka rawngbawl thin khan a rinna kha a pi Losii leh a nu Euniki te hnen atanga a chhawm a nit lat mai. Khawvela chhungkaw hrang hrangah hian fate zirtirtu leh kaihruaitu ber chu nu an ni fo. Mahni fate kawng dik ziritir ngailo nu chuan fasual a nei nge nge thin. Khawvel a nu zawng zawng hi ka nu ang vek ni selang chuan Tan in a awm hi a ngai lo ang tiin Dl Moody chuan a sawi a, nu pawimawhna a tilang chiang viau mai.

Fate pawh hian kan zir a ngai. Puithiam Elia chu Temple a rawngbawltu a ni a, mahse, a faten temple a thil hlan an tih bawrhban thin avangin Pathian hnena inthawina thlengin miin an hnualsuat phah a nih kha. Hetiang ang hi Zoram thalai ah hian kan tam tawh viauin ka ring. Pa tee maw nute emaw rawngbawlna vaw chhe char char, kohhran upa leh pastor fa thlengin sawi tur an awm. Zanin ah hian thalai kana wm, in enlet ang u, kristian chhungkaw dinna daltu lian tak kan lo ni reng em?

Kha lam chu duhtawk ang. Engvangin nge Krisitian Chhungkaw din chu kan mamawh tih hi tawite in kan sawi tel hram duh a.

A hmasa berah chuan Ram leh Hnam dam dan Kristian chhungkua kan mamawh- Kan ram dinhmun kan thlir chuan Thim thuah hnih kan hmachhawn tur te, harsatna lo thleng turte zawlnei tam takin an puang lawk a. Sualna a pung a, harsatna hrang hrangin min tlakbuak mek a ni. He kan ram, tluchhe mek hi khawi atangin nge kan siam that ang? YMA, VDP, JAC ang tein kan chhuakkhawm a, khawlaiah kan duty a, mi fate kan vua a, kan veng bawk, a tha e. Mahse, heng hia mi a siam tha tak tak thei si lo. Kan ram leh hnam dam nan chhungkaw hrisel kan mamawh. Mahni inchhungkhura kan inthunun zawh tawhloh chuan Jailah emaw Rescue Center ah emaw phei chuan inseam that har tawh tak a ni. VDP Duty ina vuak sim pawh a har tawh thin. Chuvang chuan Kristian Chhungkua kan din hi a pawimawh a ni. Chhungkaw nuam i siam ang u. Chhung kaw nu leh chhungkaw pa in ngeih taka khawsakna, fate nena inpawh tlang taka titi ho theihna chhungkua kan siam hi a pawimawh a ni. Chhungkaw tam tak, inbe hlei theilo, chhungkaw member mahni buaia buai em em mai tam tak kan awm tawh a, inkhata cheng ho si inpawh miah si lo kan tam tawh hle. Chhungkuaa Pathian kan biak ho theihloh chuan pawn lamah fel vat um viau thin mahila min pawt chhetu a awm zel ang. Chhungkaw maicham din thar leh ila, chhungkuaa Pathian be thin chhungkua atang chuan ram leh hnam tana mi hnawksak an chhuak tlem ang, kan ram leh hnam a dam nan chhungkaw hrisel tak kan neih tam hi a pawimawh takzet a ni.

A dawt leh ah chuan Kohhran nung kan neih theih nan Kristian Chhungkua kan din a ngai – Kohhran huang chhungah phur takin rawng bawl thin mahila chhungkaw nuam Kristian chhungkua kan neih si loh chuan Kohhran hlimnaah kan inchiah tak tak thei lo thin. Rilrua helhkam nei ran chunga Biakina lam vak vak ringawt hian hlimna tluantling a thlen thin lo. Rawngbawlna hi chhungkuaah tan ila Kohhran ah parchhuak rawh se. Chu chuan kohhran nung a siam ang tih hi ka ring tlat a ni.

A tawp berah chuan Mimal/mi tha chherchhuah nan Kristian Chhungkua kan din a ngai: Mi puitling, mi tha, mi dik, mi rinawm chherchhuak tur hian enge pawimawh be rang aw tih ka ngaihtuah thin a. School ah emaw college atangte emaw a inchherchhuah chi a ni em? Kohhran atangte, KNP leh TKP atang tea inzirtir sen a ni a ngem? Ni e, School te, college te, kohhran thleng hian inzirna hmun pawimawh tak nimahsela chhungkua atanga inzirtirna tha hi a bul tanna a ni. Bible leh Isua Krista zirtirna chhungkuaa inzirtir thin mi te hi thiante zinga a fel pawl, mi puitling mi dik leh mi rinawm an ni fo thin. Chhungkuaa zirtirna tha dawnglo mi hi a buaipui awm pawl an ni duh khawp mai. Vawiinah chhungkaw din tawh leh la din tur te hian Chhungkaw in nghahchhanah Pathian kan neih a, Isua Krista zirtirna inhlanchhawn hi kan tih makmawh a ni. Chithlah Pathian ngaihsak mi hi Lalpa’n a lawm em em lain Milem siam chawp be tu chu pa te khawlohna avanga chhuan thumna leh chhuan lina thlenga hrem thin a ni tih Bible ah Pathianin a sawi. Chuvang chuan chhungkaw din hi kan fimkhur a, Kristian chhungkua, Pathian be thin chhungkua kan din hi a pawimawh tak zet a ni.