TKP Zan Inkhawm

Kan thusawi min kahruaitu atan Bible chang hmun hnih a mi kan chhiar ange. Gen 12;1-2, Heb 11:15&16. Pathian hmaah I tawngtai ang u.

Nichina kan Bible chang chhiar hnuhnung zawk ah khan tin an chhuahna ram lungkham selang chuan hawnna rem chang an hmu tawh ngei tur a ni a, nimahsela tunah zawng ramtha lehzual chak an lo ni a, a ti a. Kha kha Abraham ate chungchang a sawina a ni a. Abrahama chanchin sawi tam ngai lovin kan hria a, putar kum 70 mi a nihin Haran atangin Lalpa’n a ko chhuak a, ramtiam panin a kal tir a ni. A laichin hote leh a pain ata chhuakin a nupui nen a thil neih zawng zawng nen an chhuak a ni tih kan hria a.

Abrahama nun hi a ropui ka ti thin a, keimah pawh ka in enfiah fo na a ni thin. Khawi ah nge a kal dawn tih pawh hre lovin a Lalpa’n ram ka la entir tur lamah kal rawh a ti a a chhuak tawp a. Mahse, Lalpa’n ram a tiam a, chu a thutiam chu a ringhlel ngai lova, “Rinna Pa” tia koh hial a nit a reng a ni. Chu ramtiam a panna kawngah chuan harsatna hrang hrang a tawk a, a laichin Lota nen ngei pawh inrem theiloa an awm chang te, a nupui Sari pawh ka nupui ti ngam lova ka farnu tih hial ngai khawpa hlauthawng a a awm chang te a awm a. Ramtiam a panna kalkawngah khan harsatna hrang hrang tam te thleng tuarin a awm a ni tih kan hria a. Lalpa’n chi ropui takah ka siam ang che a ti a, mahse a nupui a ching a, fa nei thei lovin a awm a, a bawihnu lakah fa te hial a nei a nih kha. Ramtiam a panna kalkawng kha ringtu nun kawng a ni a, harsatna leh manganna, buaina te hian ringtu nun hi a tibuai fo thin a. Kawng ngil taka kan kal theih loh chang te, a kawng a kual deuh chang leh a kawng a bumboh deuh chang te a awm thin a ni.

Nimahsela Abrahama chuan hmalam a en tlat a, ram tha lehzuak, vana mi a chakna leh a beisena khan a hruai tlat a ni.

Beiseina hi mihring nunah hian a pawimawh khawp mai. Mihirng te hi engine nge hmalam min pantir thin ti ta ila beiseina hi a ni mai awm mange ka ti. Mihiring hian hmalam hunah beisei kan neih tawh loh chuan dam hian awmzia a nei a lo va, nun hi a ho vek mai a ni. Mahni a intihlum Suicide kan tih te pawh hi a chhan ber nia lang chu an hmalam hunah engmah beiseina an neih tawh loh vang a ni mai. Lehkha kan zir chhan te pawh hi nuamsa zawk leh fing zawka kan awm kan beisei vang te a ni a. Hna kan thawh na chhan pawh hi a aia tha zawk kan beisei vang hi a ni deuh ber awm e. Ringtu nunah pawh hian beiseina hi a pawimawh em em a, thihnu piah ram kan beiseinain min hruai loh a, kan nuam tih vang leh rual pawl na nia kan hriat vang mai maia kohhranah te hian kan tel a nih chuan a tawp kan thleng zo lo ang.

Chu beiseina chuan Abrahama nun chu hmalamah a khalh tlat a, hawnna remchang tam tak hmu tawh mahsela a aia tha zawk a beisei tlat a ni. “An chhuahna ram chu lungkham selang chuan hawnna remchang an hmu tawh ngei tur a ni a”… a dik khawp mai. Abrahama nun kha en ta ila hrehawmna leh tam a tawrh lai te, Pathian in a tiam anga a beisei huna fa a nei mail oh laite khan Kanan hawisanin Haran lamah khan let leh dawn ta sela remchang tam tak a nei ngei ang. Pathian lakah pawh vui duh selang chuan chhan tha tak tak chu a nei ve ngei ang le.

Nimahsela ram tha leh zual chaka a beiseina khan a hruai a, hma lam a pan tlat thin a ni. Kan nun hi in en ve ta ila, remchang kan hmuh a piang hian kan hnuchhawn ramah hian kan kir leh mai thin em? Aigupta sable ngaia Israel fate an tap ang mai khan kan nun hian kan chhuahsan ram a ngai thin em? Chutiang ang mai maia kan nun hi a let leh thin a nih chuan kan hmalama thil awmah kan chiang lo tihna a ni ang. Kan thiante chan tha deuh leh nuamsa deuha an awm kan hmuh chang te’n an tih anga tih ve mai duhna te, khawvel thila in hnuh luh ve mai duhna te kan nei thin a nih chuan Van lamah kan rilru kan la dahtawk lo a ni thei ang. Chunglama thil awmte hi kan beiseina leh kan nun min kaihruaitu ni fo sela, hnung lam kan hawi dawn pawhin chung lam thlir thin ila, Isua Krista ah kan beiseina siam thar thin ila, kan ringtu nunkawng hi engmaw hlekah pengbo leh let leh mai lo turin ram tha lehzual vana mi chakin beisei ila, chu kawng chu I zawh zel ang u. A thu kan tih rik takte kan za atan Lalpa’n mal min sawk sak theuh rawh se. Amen…

Kros lamtluangah ka hawi kir long ka kir leh tawh lawng.