Amen

Chanchintha Luka ziak 1:28-38 

Nichina kan bible chang han chhiar takah khan Vantirhkoh leh Mari inbiakna kan hmu a. A Christmas lam hawi kan ti zet tak naa khami an inbiak lai vel kha chu Isua pian hma thla kaw hmalam daih kha a ni a, Dec thlaah Isua pian cham kan lawm thin a, chuti a nih chuan April thla hma lamah daiha Mari leh Vantirhlkoh inbiakna a ni zawk dawn tihna a nih chu. Isua pian hun chungchangah hian ngaihdan hrang hrang a awm a, amaherawhchu khalam kha kan sawi tum a ni lo a, kan kalsan rih ang.

 Isua a pai dawna Mari thu awihna leh a inpekna hian ka rilru a hneh fo thin a, ka nun hruaitu leh Pathian rawngbawl tura ka inpekna ti thar fo thintu pawh a ni a, he thu hi a sawi pawh ka sawi fo nghe nghe a ni. Zanina ka thusawi tur hi a thupui han vuah mai dan pawh ka thiam lo a, “I thu ang zelin ka chungah thleng rawh se” tih ang ten kan dah chhin a, a goal ah ka khalh lut thiam ange maw.

Isua a pian dawna Mari thuawihna hi a ropui hle a, Vantirhkohin Mari a bia a, Isua a pai tur thu leh a hrin tur thu te a hrilh lai khan, Mari tan khan chhan a har awm hle hian ka hre thin a, khawvel chhandam tu tur Messiah, Israel fa ten an nghahhlelh, zawlnei Isaia ka hmanga Pathianin anmahni chhanchhuak tu tur Immanuela, hla tak Pathian ni loin an hnena awm Pathian pek a lo tiam tawh ti hlawhtling tur khan Vantirhkoh kaltlanga Pathian Aw kha Mari tan Amen a ngai a, harsa leh huphurhawm tak ni mahsela Lalpa bawihnu ka ni e tiin Mari khan Lalpa’n ti tura a tih kha a paltlanga vawiin thleng hian kan chhandamtu Isua Krista piancham kan lawm theih phah ta a ni.

Pathian hmaa Mari tlawmna kha hnehna nun bul tanna a ni a, bawih nihna dinhmun atanga Pathian a dawr avang khan channdamtu Messia a lo piang ta a ni. Bawih dinhmun hi kan hrethiam vek anga. Khang hun laia bawih an hmuh dan dik tak chu mihring pawh tling lo, ran leh thlai ang maia lei leh hralh theih an ni a. Anmahni leitute tana rinawm taka a nuam emaw a hrehawm emaw pawh sawilo a hna thawh kha an tih tur a ni tawp mai. Kan naupan lai khan Pu Toma In tih thawnthu tawite lar tak kha a awm thin a, Bawih pakhat Pu Tawma chanchin, bawih rinawm tak chanchin kha in chhiar ve thin ngeiin ka ring a, kan mittui te pawh a tihtlak nasat theih thin kha.

Chutiang bawih dinhmun atang chuan Mari khan Pathian a dawr a ni. Vantirhkoh leh Mari inbiakna bul lam kan en chuan Vantrihkohin Mari a rai tur thu leh fa a hrin tur thu a hrilh a, mahse Mari khan mihirng ngaihtuahna atangin Pathian a dawr a, Luka bung 1 chang 34 ah khan Mari khan Vantirhkoh in I rai anga fapa I hring ang a tih chu rinhlelhna nen a chhang let a, “Chung chu engtin nge a thlen theih ang Mipa ka nei si lo a” tiin a zawt a. Ama ngaihtuahna leh a remhriatna te, a finna leh a duhdanin Pathian remruatna a thlir a, mihring kalphung pangngai a chi inthlah dan te, nupa inseam hnu a fa neih dan zawng zawng te a ngaihtuah a, a harsat zia leh tih theih a nih lohzia a hmu a, a zawt let a nih kha.

Mahse Vantirhkohin Elizabeth-I chunga Pathian hnathawh ropui takte an hrilh a, counseling a pek hnu chuan Mari chu a tlawm ta zan mai, Pathian lakah engmah a nih lohzia, a nun chu a thu a nih lohzia leh Pathian ta a nihzia te an hmuh meuh chuan, Pathian hmaah chuan mi te tak te, mihring pawh tling zo mang lo, bawih ang lek a ni tih a hria a, chu dinhmun atang chuan Pathian a dawr a, “I thu ang zelin ka chungah thleng rawh se” tiin a zawr ta hnap mai.

Lalpan min kohna kan chhan dawn te, a rawng kan bawl dawnte hian kan ngaihtuahna a vak kual nasa ve thin a. Kan thiamna leh kan finna te kan thlir a, Pathian rawngbawl harsat zia te, keimani nunah ngei pawh Isua Krista a pian theihlohna chhan te tam tak kan hmu fo thin. “Chung chu engtin nge a thlen ang?” tiin Pathian kan zawt let fo thin a nih hi. Mahse, Lalpa hian kan duhdan leh kan tum dan hian rawng min bawl tir te, a hnung min zui tirte hi a tum a ni ber lo a, a remruatna hnuaia kal mai tur leh bawih te’n engmah hnial lo a, an pute thu an zawm thin ang hian a thu zawm mai turin min duh a, chu dinhmun atang chuan a ropuina a puang chhuak thin a. Khawvelin a theih loh a tih hi a theih thin a, a diklo an tih hi a dik thin a, Isua Krista chu a lo piang chhuak a, Pathian hmel a lo lang thin a ni.

Keimahni ah Isua Krista a lo pianchhuaha mite’n kan nunah a hmel an hmuh theihna tur chuan, “I thu ang zelin ka chungah thleng rawh se” ti a bawih dinhmun atanga Pathian min kohna kan chhan hi a pawimawh hle mai. Mi tam tak hi chuan Pathian thu ngaichanglo leh a remruatnaa innghat lo hian a hnung zui kan tum fo thin a, Pathian rawngbawl kan tum fo thin. Chu dinhmun atang chuan lawm chunga Lalpa rawng bawl hi a harsa tlat thin a, Pathian lakah kan vui a, zawhna tamtakin min umzui reng thin a ni. Rawngbawlna peng hrang hrang Kohhran member nih atanga TKP hruaitu, BKHP hruaitu, BMP hruaitu, kohhran upa leh Pastor hnaa rawngbawlna thleng hian bawih nihna dinhmun atanga ke kan pen loh chuan kan rawngbawlna te, Isua Krista hnung kan zuina te hi a lo hahthlak thin a. Kohhran ah te, midang nunah te vuivaina tur leh phunnawina tur hlir kan lo hmuh hmah thin a, keimahni ah Isua Krista a piang chhuak thei lo a, amah chawimawitu aiin a hmel hliahtu kan lo nih phah fo thin a ni.

Kalvari tlang hahdam pui si lova Kros kawng zawh hi a hahthlak a, a hrehawm a, vui leh vaina tur a tam a, lung a awi thei lo a, rawngbawl ve nia inhre si hian hah tak chungin rawng kan bawl a, rah chhuah hmuh tur awm si lovin kan buai ve em em thei a, Pathian ti lawm chuang si lo hian thui tak kan lo kal ve thei a ni. Chuvangin “Lalpa bawihnu ka ni, I thu ang zelin ka chungah thleng rawh se” tia Mari’n Pathian hmaa a in submit ang hian Lalpa ah hian in submit ila, kan duh dan ni loin a duhsan zawkin Lalpa rawng hi bawl ila, lawm takin Krista hnung kan zui thei anga, a rawng pawh kan bawl thei ang.

Amaherawhchu, bawih dinhmun hi dinhmun tha a ni ngailo tih kan hriat reng erawh a pawimawh khawp mai. Mite hmusit, mite nuihzat, hna hnuaihnung leh hrehawm tinreng thawk a, miin ei rawh, in rawh tih hun nghaka hreawm taka awm thin an ni a, chu nun tawmpuitu kan nih erawh a ngai a, aman kan pek a ngai a ni tih hi kan hriatfo a pawimawh khawp mai.

Mari kha kan hria a, Isua a pai dawn lai khan Pasal hual lai nei a ni a. Juda ho hnam danah hi chuan an inhual tawh hi chuan innei ang deuh chiah an ni tawh a, pasal dang emaw mipa dang emaw an va neih a thiang tawh lo. La chenghoin la mu dun lo mahsela mipa dang an neih hi chuan uire ang hiala ngaih an ni. Uire hremna dan an neih chu lunga denhlum a ni, a rapthlak hle mai. Lapa’n Mari hnena “I rai anga fapa I hring ang” a tih lai khan kawng awlsam tak a ni lo a, thil theihloh leh awihawm loh tak ang zawk hial a ni. Amaherawhcu mihring mawina leh mite hmuha mawina a ngaihtuah hmasa a, Pathian hnathawh daltu a nih tlat si avangin bawih nihna atanga Pathian “AW” chhangin zahna te, hrehawmna te,lungngaihna te, hmusitna te leh sawichhiatna tinreng phur turin a inpe ta zawk a ni.

Josefa nupui hual lai, a man pawh pek fel vek tawh a ni a. A pasal hual fa ni lo midang fa a pai tur kha han ngaihtuah ringawt pawh hian a rapthlak hle mai. Zanin ah hian nula tam tak in awm a, nangmahni ah han inchan chhin teh u. Pasal nei turin Kohhranah te puang dum dum tawh sela, midang fa han pai daih dawn ta ula ngam a har viauin ka ring. Tam tak hi chuan tihthlak mai pawh in thlang zawk maithei a ni.

Chung zawng zawng chu Mari khan a ngaihtuah ve ngeiin ka ring a. An thenawm khawveng te’n an sawi dan tur zawng zawngte, pasal hual nei reng chung si a midang fa han pai tlat mai te, a pa pawh kawh tur awm mang lo a fa han pai ngawt mai te kha chu a huphurh ve hle ang. Ama chhungte chu sawiloh a pasala chhung ten an hmuh dan tur zawng zawngte pawh a ngaihtuah thleng pha ve ngei ang. Nimahsela, chung a tawrhna tur zawng zawngte ai chuan Lapa thuchhuak zawm chu a thlang a zawk a, amah atang ngeia Isua Krista, chhandamtu ropui Messia piang tur chuan a rilru a hneh a, “I thu ang zelin ka chungah” thleng rawh se tiin AMEN a pe ta a ni.

Zanina thalai lo kal khawm te hian Mari nun atang hian kan nun teh ta ila, Pathian hmaah hian kan inpe pumhlum thin em? Kan nunah hian Isua Krista a pianchhuah theih nan hian keimahni nge kan dah pawimawh hmasak Pathian? Tam tak hi chuanin chunglam thu ngaichanglo hian kan chakna zawn ah leh kan duhna zawn hian rawng kan bawl thin a ni ti rawh u. Krista hnung kan zuina kawngah pawh hian hrehawm deuh ai chuan nuam deuh zawka zui te kan tum fo thin. Kan hma lawkah Christmas te pawh kan hmang leh dawn. Engtin nge plan kan siam lawk le? A nuam thei ang berin, thawmhnaw thar mawi leh manto tak tak nen, chhas te ar kan pui tum ranin rilru te pawh kan lo siam fel tawh a ni maithei. Mahse kan nun hi kan ta a ni lo a, mana lei kan ni tawh a. Tirhkoh Paula chuan “Mana lei in ni tawh a sin, chuvangin in taksaah chuan Pathian chawimawi rawh u” min ti a. Min leitu Pathian ta, a duh duha a hman tur, a bawih kan ni tih hi kan hriat nawn fo a pawimawh hle mai. Thalai Kristian Pawl member, member active tak kan nih chuan mahni duh dan dana kan awm a thiang tawh lo. Mite’n kan nunah Isua Krista an hmuh theihna turin kan nunah Isua Krista kan pian chhuah tir a ngai a, Isua Krista a pian theihna tur chuan “I thu ang zelin ka chungah thleng rawh se” ti a kan nun zawng zawng leh keimahni, kan taksa, kan rilru leh kan ngaihtuahna te hi Pathian tan kan pek a ngai a ni. Kan tawrh a ngai a ni maithei, kan zah deuh te pawh a ngai a ni maithei. A chang chuan harsa kan tih chang pawh a awm ang, mite bula kan thrin fal nalh hun te pawh a awm a ni maithei e. Mahse “LALPA thu hniallo a hnung zuitute, Isua Krista pianchuahna mihring chu chawimawiin an awm fo thin a ni. Mari’n “Ka nun hian LALPA a chawimawi e” tia testimony ropui tak a nei ang khan “I thu ang zeln ka chungah thleng rawh se” ti thinte nunah hian Pathian a in puangchhuak thin a, a ropuina tar lanin a awm thin. Kan thiamna leh kan finna te, kan theihna leh kan chakna te hi kan mawipui zo lo a, kan that pui zo hek lo. Chungnung bera thiltihtheihna hi min hliahkhuhtu a ni a, a thu anga kan nun a, kan chet a, thil kan tih hian mite hmuh ah kan lo mawi thin a, kan nunin Lalpa a chawimawi bawk a, keimahni ah Pathian hmel a lo lang thin a ni. A thu kan tihrik takte kan zavai atan Lalpa’n mal min sawm sak theuh rawh se. AMEN